بعض الرجال كبار لكن مهابيل

بعض الرجال كبار لكن مهابيل

قصيدة رائعة للشاعر فيصل الباهلي , يقول فيها:

لولا المـواقف ما عرفت الرجاجيل

والرجل يعرف بالشدايد والافعال

انا اشهد به ناس وقت الهائيل

لاجد وقت الجد تطرى على البال

من يعجبونك في جميع المداخيل

ناس تعز الطيب من كل مدخال

وما كل رجالٍ يمد الفناجيل

يتبع دروب الطيب في كل الاحوال

وترى العمر ماهوب فرق المشاكيل

والهرج مايرفع من الناس دجال

بعض الرجال كبار لكن مهابيل

المرجلة ماهيب بالكبر والمال

وبعض الرجال اجسام لكن تماثيل

جسمٍ كبير وداخله قلب تمثال

يملى عيونك بالشكل كنه الفيل

ولاحان وقت الجد كذبت الاشكال

ما ينفعك وقـت الشقا والغرابيل

ياليت تسلم من كلامه والاقوال

ومنهو يظن ان المظاهر دواليل

به ناس نقص وتلبس شماغ وعقال

والدلة اللي دون نار ومعاميل

ماتسقي الخرمان لو ربع فنجال

وبعض الرجال يكيد لك بالمحبيل

يخفي بضحكه لك من الحقد زلزال

السن ابيض لكن القلب كالليل

ماكل من يضخك معك يسعد الحال

ولولا الحسد والبغـض والقال والقيل

كان العرب صارت على قلب رجال

هذا كلام الحق من غير تدبيل

حبيت اقول الصدق والصدق ينقال

اقبل كلامي فيه بعض التفاصيل

شي مجرب ماخرصته من البال

ولـولا المواقـف ماعرفت الرجاجيل

وكان استوى بالهرج خايب ورجال

مقالات ذات صلة

زر الذهاب إلى الأعلى