قصيدة دمعة رجل مبارك الحجيلان

لا شفت لك دمعة رجل شوف الاسباب لا تقول عيب ولا تشمت بحاله

كلمات قصيدة لا شفت لك دمعة رجل للشاعر مبارك الحجيلان [1] ، لا شفت لك دمعة رجل شوف الاسباب لا تقول عيب ولا تشمت بحاله وده يخبيها وخآنته الاهداب وتفجرت من يوم شي طراله.

قصيدة دمعة رجل

لا شفت لك دمعة رجل شوف الاسباب
لا تقول عيب ولا تشمت بحاله

وده يخبيها وخآنته الاهداب
وتفجرت من يوم شي طراله

ما طاح دمع كنه الوبل سكاب،
إلا من اللي داخل الصدر شاله

رجال تبكي دم من فقد الأحباب
ورجال تبكيها حياة الرزاله

وترى الظروف تخلي الشخص مرتاب
يصير به مثل الجنون انفعاله

ما هو جنون إلا بعد حرقة أعصاب
ومن وين ما طق الهدف ما صفاله

لا راتبه يكفي ولا الحظ به طاب
والا تدين ضيق الدين باله

وتدري متى يفرك لك الناب بالناب
لا صار عاجز والتفت في عياله

دنيا غريبه والبشر صاروا أغراب
أغراب … لأن الناس كل بحاله

من أول الطيب ترزه بالأنشاب
واليوم لا … اللي يرزه رياله

وشلون أردى الناس يصبح له أنياب
يا وقت ليه الظلم وين العداله

ويا صاحبي اللي بك الظن ما خاب
لا يضيق صدرك وأنت راعي الشكاله

بكره تزين وتنفتح كل الأبواب
ما فيه بقلوب الرجال أستحاله

مشكلتك أنك رايح لشخص كذاب
ليته تعذر يوم جته الرساله

يركض ويدفع للمظاهر والألقاب
وعلى بني عمه قليل وصاله

أقسم قسم بالله يا بعض الأقراب
يا قربهم كنه على الكبد عاله

وأقسم قسم بالله يا بعض الأجناب
تحرجهم من زود الكرم والجماله

جنب أبو ما أقدر وأبو أكتب كتاب
وأزهم أبو لا شاش طوح عقاله

رح للكريم اللي يحسب لك حساب
يا من نهض لك ثم ردت سهاله

اللي ليا غابوا أهل العذر ما غاب
والله يبارك في حلاله وماله

ولازم تميز بين نشمي ونصاب
من قبل لا تكتب لأي واحد رساله

ولازم تميز بين نشمي ونصاب
من قبل لا تكتب لأي واحد رساله

بعض البشر يفرح على جية أصحاب
والبعض لا شاف الخوي ضاق باله

مراجع[+]

زر الذهاب إلى الأعلى