قصيدة من لايعدك ربح عده خسارة

كلمات قصيدة من لايعدك ربح عده خسارة ، كلمات الشاعر مبارك الحجيلان ، ما كل رجالاً لبس بشت رجال كم واحداً ماهو بيديه قرارة

معلومات القصيدة
اسم القصيدة: من لايعدك ربح عده خسارة
اسم الشاعر: مبارك الحجيلان [1] ، [2]

من لايعدك ربح عده خسارة

بدري عليك اللوم يا ضايق البال
قلبك تحملك ضيقته وانكسارة

ما يفرح بحزنك سوى ناس عذال
والا الرفيق يذوق مثلك مرارة

هيه كذا الدنيا سهالات واهوال
تاره تبسم .. وتبكيك تاره

فيها بشر عانت لاجل تبني اجيال
واشخاص عاشت لاجل تبني عمارة

ريح ركابك جامل الناس واحتال
على شعورك لا تبين .. دمارة

وسرك لو انك تكشفه صار جوال
الناس تبغى الاكشنه .. والاثارة

ما كل حزن يسكن القلب ينقال
بكره يدور اسمك على كل حارة

ولا انت باول شخص قالوا بالامثال
النار دايم مبتداها .. شرارة

اضحك بوجه اعداك في كل الاحوال
لا جوك مقصودين سو استدارة

خلك مع المحتال غامض ومحتال
ومع طرقته دامه مجاريك جارة

لو قال كيف الحال جاوبه بالحال
وضح له انك مبتهج بالزيارة

ولا راح ما يمنع لو تجر موال
جرة غريب وده بشوف دارة

وش تنتظر من ناس ما عندها اشغال
ناساً تحسب ان المغثه شطارة

وبعض المصايب تفرز اشكال واشكال
تظهر به الرديان .. واهل النعارة

ولو تشخل اللي يعرفونك بمشخال
تقول انا اطيب بشر عن جدارة

تشوف فزعة شخص ما هو على البال
واللي اتهقوى به يسوق اعتذارة

واللي توقف له مواقيف الابطال
يقعد ويشمت فيك خلف الستارة

اياك والحقران في بعض الازوال
وترى الشكل ماهو دليل الطهارة

ما كل رجالاً لبس بشت رجال
كم واحداً ماهو بيدينه .. قرارة

واللي يجيك وللثقيلات شيال
هو اللي يفخر فيه بشت الامارة

عليك باللي يلحق القول بافعال
والا الردي خله وجنب مسارة

انا اشهد انه ماكذب واحداً قال
من لا عدك ربح عده خسارة

مراجع[+]

زر الذهاب إلى الأعلى